සිරිසඟබෝ රජු රටවැසියාගේ සිත් දිනාගෙන රජකම් කිරීම නිසා ඊළගට රජ වීමට බලාපොරොත්තුවෙන් සිටි සිරිසඟබෝ රජුගේ අමාත්‍යය, භාණ්ඩාගාර නායක ගෝඨාභය මදක් නොසතුටින් සිටියේය.රාජ්‍යය ලෝභයෙන් පිරුණු ගෝඨාභයට ඉවසාගෙන සිටීමට නොහැකි වූ තැන නුවරට උතුරු දෙසින් රාජ්‍යය ඇල්ලීම පිණිස සේනාව මෙහෙය විය. සිරිසගබෝ රජුට මෙය ආරංචි විය. ගෝඨාභය සමග සටන් කිරීමෙන් රටවැසියන් වූ සිංහලයාම විනාශ වන බව තේරුම් ගත් රජු තපස් වෙස් ගෙන වන ගත විය. ගෝඨාභය රජකමට පත් විය.නමුත් රටවැසියා තුළ සිරිසඟබෝ රජු කෙරෙහි තිබූ පැහැදීමත් රජු ආ ගිය අතක් කිසිවකු නොදත් නිසාත් සන්සුන් මනසින් ගෝඨාභය රජුට රාජ්‍යය කරගෙන යාමට නොහැකි විය.එබැවින් සිරිසඟබෝ රජුගේ හිස ගෙනැවිත් දෙනකෙනෙකුට දහසක් තෑගි දෙන බව දන්වා රටපුරා අණබෙර යැවීමට රජු කටයුතු කළේය.
