සිරිසඟබෝ රජු කාලයේදී රුහුණු වැසියන් රතැසි නම් ඇස් රෝගයකින් මරණයට පත් වූ බව කියවේ. එය රාක්ෂයකු විසින් ඇති කළ රෝගයක් ලෙසට ජනයා අතර කතා පැතිරුණි. යක්ෂයා දුටු අය ඇස් රතු වී මරණයට පත් වූ අතර, එම රෝගීන් දුටු අය ද මරණයට පත් වූහ.වැසියාට වන විපත ඉවසා ගත නොහැකි වූ රජතුමා රතැසියා නම් යකු හමු වී මිනිසුන් පිළිනොගෙන, තමා බිල්ලට ගන්නා ලෙසට ඉල්ලීමක් කළ බව කියවේ. නමුත් රජුගේ සත්පුරුෂභාවය නිසා යකුට එවැන්නකුගේ මස් කෑමට වරම් නොමැති බැවින් සෑම ගමකින්ම යකුට බත් පිදේනි ලබා දීමට රජු එකග වී ඇත. ඉන් පසු වැසියෝ රජුගේ නියමය පරිදි යකුට බත් පිදේනි තබා උවදුර දුරු කර ගනිති.
